عبر حسابه الرسمي على أحد مواقع التواصل الاجتماعي، نشر الممثل محمد رمضان فيديو أوضح من خلاله أنه لم يقصد الاساءة للراحل الفنان اسماعيل يس، وإعتذر من أسرته مؤكداً أنه لم يتهمه بالإساءة للجندي المصري في أفلامه الشهيرة !!
وقال محمد رمضان: "كل سنة وانتم طيبين وعيد سعيد عليكم وعلى الشعب المصري والوطن العربي جميعاً.
. بالنسبة للتصريح اللي نزل النهارده، على أن أفلام الأستاذ إسماعيل يس تسيء للجندي المصري .. حق التوضيح إسماعيل ياسين ده أكتر ممثل يضحكني في الدنيا وأغانيه كلها حافظها .. ويشهد على كلامي الأستاذ أيمن بهجت قمر .. وقد إيه بنقعد نراجع حفظنا لأغاني الأستاذ إسماعيل يس من "ماتستغربش" و"السعادة" .. وكل المونولوجات العظيمة اللي عملها .. وكل اللي يعرفوني عن قرب عارفين مدى حبى للنجم الكبير الأستاذ إسماعيل يس".
وتايع: "ولكن السؤال كان هل في مخططي أنى أعمل فيلم عن الجندي المصري؟ .. فقلت : لأ الأفلام دي اتعملت .. وأنا حابب إني أعمل أفلام تبيّن هيبة الجندي المصري ومدى انضباطه ومدى التزامه ومدى انتمائه للجيش ومدى انتمائه للبلد .. ده كان ردي، إن أنا مش عاوز أعمل العسكري اللي اللبس واسع عليه و"الآيش معووج"، واللي فهمه بطىء، لأ أنا عايز أعمل الجندي المصري كما ينبغي أن يكون، فالرد طبعاً أو التصريح مستفز جدًا وملوش علاقة بشخصيتي، وعمر ما كان ده رأيي في الأستاذ اسماعيل ياسين، ده نجم كبير جداً ومن أهم رموزنا كمصريين، وبس ده توضيح وأرجو أن أسرة النجم الكبير الاستاذ إسماعيل يس يوصل لها حق الرد بتاعي وتوضيحي على التصريح اللي اتكتب".
وختم قائلاً: "ده تصريح فقط لكي يشد القارئ وحضراتكم كلكم لازم ما نخدش بالعنوان من بره ونحاول نوصل لرؤية الشخص في الجملة اللي اتاخدت، وكامل احترامي للنجم إسماعيل يس وكل رموزنا الفنية القديمة والموجودة دلوقتي كلهم نجوم كبار وأنا أتعلم منهم من أقدم واحد لأحدث واحد فيهم".
